Heb 10 | WSK | STEP | Law Den mu munan yawara iru Kristus ago tairuk ale nangarukko wore ko kausa. Ale mu yam ko koma tata. Buta se, Law Den te tama betera ko balso, mu kariimet Kaem kote pingi namakasan mu nunga sangukko me terong. Nuna yar suen la ningi tama am koma suwanta bita se lagakasan, bare Kaem koma te kariimet ningo diram nunguningkiri me aratukasan. Tama mu nunga memek me siwukaso.

Hebrews 10

Kristus kariimet suen la nunga tama tom suwanta beteram

1 Law Den mu munan yawara iru Kristus ago tairuk ale nangarukko wore ko kausa. Ale mu yam ko koma tata. Buta se, Law Den te tama betera ko balso, mu kariimet Kaem kote pingi namakasan mu nunga sangukko me terong. Nuna yar suen la ningi tama am koma suwanta bita se lagakasan, bare Kaem koma te kariimet ningo diram nunguningkiri me aratukasan. Tama mu nunga memek me siwukaso. ^{▼▼Heb 10:1-4 Kristus mu mel tuaturum nuna bitakasan wore ko nunguning nu am bita saparam: Col 2:16-17.} 2 E nunga tama bitakasan mu nunga memek siwukaso se ningo diram aratukasan ale mu, nuna udagi nunga kilek memek beteman mu ko me ikia tokasan, ale udagi tala Kaem tama me tuikasan ale. 3 Bare mena. Tama mu nunga memek me siwukaso, se nuna yar suen biya tama bitakasan. Se tama umutang te nuna nononga memek ko nungamili sapurukko me terong, mu am nungamin te anikaso. 4 Mu awuk, bulmakau belelek nunga gue mu kariimet nunga ikup memek kutuwu sapurukko me terong.

5 Buta se, Kristus ali imi te tairukko nega se, Kaem maonam:

“Ba,” mam, “ni nuna tama bita kisimonko me kuesam,
bare ni aninga angimik guang bo nunguru aisem.
6 Bulmakau mel te tama bita kisisan se kani saposo,
se nunga ikup memek kutuwumonko tama betesan,
mu ni me ko kuesam ale me ko amilmilasam.
7 Se ani aking balem, ‘O Kaem, ani iweya.
Nika ikia ka gemang la karo kisekko tairem,
ago ko maingkala bataguru beteman se aniso iwitatala.’” ^{▼▼Heb 10:5-7 Psalm 40:6-8.}
8 Kristus giram Law Den te tama betesan mu ko iwita balam, “Ba, ni nuna nunga memek ko tama bita kisimonko mu me ko kuesam, ale tama betera duap duap me ko amilmilasam.” 9 Aking udagi balam, “Ani iweya. Nika ikia ka gemang la karo kisekko tairem.” Nu buta balam ale umutang te munan giram aniram mu ira kutuwu beteram, ale ko kuwim te munan iru mu patawu baongam. 10 Jesus Kristus Kaem ko ikia, ko gomang karo tuam, ale tom suwanta kota ko kumik guang te Kaem tama tuam, umutang te nu anananga memek siwu saparam se ana kako arataman. ^{▼▼Heb 10:10,14 Jesus nanga memek siwuram ale kako nanga awuram: John 17:19; 1 Peter 2:24.}

11 Priest alo tom suen biya nunga ura bita se, tama koma suwanta la bita lagakasan, bare mu kariimet nunga memek siwurokko me terong. 12 Bare Kristus mu tom suwanta ko, kariimet nunga memek siwurokko Kaem tama tuam, se noko tama beteram mu tom suen biya ko. Ale nu Kaem kuting sengam mu te namaram dagi se bagoso, 13 Kaem kari nu ilak kagersan mu nunga gi suwik duap ningi nunga awurokko. 14 Mu awuk, tama suwanta nukung te la, nu kariimet Kaem nunga giwoso mu kako nunga awuram se nuna tom suen biya uwutata bagomonko.

15 Se Korang Bur betelatala mel imi ko nanga manaruwoso. Se ko den giriso balso mu iwita:

16 “Kari Biya iwita balso:
‘Tom tai aratuk se ani arungu den iru iwita nungekkowo:
Aninga munan den mu nunga ikia te bitirik,
ale nongomang te bataguru bitirikko.’” ^{▼▼Heb 10:15-17 Jeremiah 31:33-34.}
17 Ale aking balso,

“Ani nunga munan kiara kilek, nunga betera kaora memek, mu siwu sapirik ale
udagi angamin te me anirukkowo.”
18 Se Kaem memek siwu sapuruk, mu udagi te memek siwura ko tama betera bo mena.

Ana Kaem kote pingi namanakko

19 Buta se aga singsang, ana me nguanganakko. Ana Jesus ko gue te, kuwim kako nunguningkiri mu ningi Kaem kote namanakko. 20 Motam motam guang biya kuwim mu ko lage kaolam anikaso. Bare guang baruku koma singsang awura iwita, Jesus kota ko kumik guang te lage iru, ana kariimet marak nangarso, umu kagaru nangaram. ^{▼▼Heb 10:19-20 Guang biya ko den: Mat 27:51-52.} 21 Nu anananga Priest Supuling biya ko bagoso, nu Kaem ko kariimet suen la nunga bitarso. 22 Buta se ana me nguanganakko, bare am nangamang ningi nunguningkiri te Kaem kote pingi namanakko. Mu awuk, Jesus ko gue te nanga memek suen biya siwuram, ale nanga dolara nguangara menawu saparam, ale yu ningo nuam mu te nanga anuwam.

23 Nangamang ningi nunguning ana balsan karogo masan, mu ana ninguru ilukuawunakko, mu awuk, Kaem mel bitirukko nanga maonam mu bitirukkowo! 24 Ale anananga saki nunga nangamin tugunak ale nongomang sokel tunak, se nunumi ko kua se nunumi sangaru se la bagomonko. 25 Ana saki alo betesan turan, nanga Kris biguwura nabiring tunak ale awar me baganakko. Mena. Ana biguwunak ale nainimi nangamang sokel tunakko. Mu awuk, nina ikisan, Kari Biya ko tom biya pingi awoso, se nainimi nangamang sokel tua ko ura mu ninguru tala betenakko. ^{▼▼Heb 10:25 Ana biguwunak ale nainimi nangamang sokel tunakko: Acts 2:42; Heb 3:13.}

26 E ana den nunguning ko ikinak, bare udagi am memek bita karogo namawanak, mu ana memek mu te siwunakko lage bo mena. 27 Mu ana tutera kam se tama biya kariimet Kaem ilak kagersan mu te kani namomonko mu ko nguanga se baganakko. 28 Nina ikisan, awiriya Moses ko Law Den ari miakaso, ale buring tuikaso, se nuna kari ilagala agi ilagala suwan nunga arukasan se mu nunguningta makasan, mu nuna kari umutang nongomang me tuikasan, am moakasan se kuakaso. 29 Buta se kari Kaem ko Namar ilak namawa miakaso ale buring tuikaso, ale Jesus ko gue noko memek siwuram mu mel yam ko bitakaso, ale Korang Bur Kaem ko gomang lila nangarso mu nu mel yam ko bitakaso, mu nina awuk ko ikisan? Mu nu koma memek biyala nunguningkiri taukkowo! 30 Mu awuk, ana Kari iwita balam mu ko ikisan, “Kari ko memek koma tua mu aninga ura, se ani nu koma tuekko.” Ale aking balam, “Kari Biya ko kariimet nunga tuterukko.”’ 31 Se Kaem marak bagoso wore kari iluwok ale ko memek koma tuokko mu am memek biya nunguningkiri, se ko nguangara karogo! ^{▼▼Heb 10:26-31 Sinar ta ko den: Heb 6:4-8. OT ko den: Deut 17:5-6; 32:35; 9:19-20. Tutera kam biya: Rev 20:15.}

32 Bare nina giriman Kaem ko nikim aringiman ale taman, umutang ko ikialko. Tom umutang te nina ikup ninguru gikasan, bare sokel ago sanamikasan. 33 Tom saki mu nuna kariimet nomotam te den memek ninguru ningarukasan, ale ninga bita maguwukasan. Se tom saki mu nina kariimet ikup uwutata gikasan mu arungak sanamikasan ale nunga sangarukasan. 34 Nina ninga saki talipara ningi bagakasan mu nunga neneman magakaso se nunga sangarukasan. Se kari saki ninga mel suen la gikasan mu nina am amilmil ago bagakasan. Mu awuk, nina ikikasan, nenenga mel nunguning tom suen biya ko mu am aniso. ^{▼▼Heb 10:34 Anananga mel nunguning mu duruk wonong te aniso: Mat 6:19-21.}

35 Buta se nina nguangara bo mena, nengemang ningi nunguning ilukuawuralko. Umutang mu nina koma ningo talko. 36 Nina sokel ago la sanami se, Kaem ko ikia ko gomang karo tui se bagaralko. Umutang te asele nina koma ningo Kaem ningarukko balam mu talko. 37 Mu awuk, Kaem ko batoga te iwita balam:

“Kam maiya mena, kam tukunangta se kari taiwoso mu tairukkowo.
38 Kariimet diram mu nongomang ningi nunguning te bagomonko.
Bare awiriya peleruk, mu ani noko me amilmilirikko.”
Bare ana mu kariimet arikaya nguangasan ale pelesan ale sarenga namasan mu nunga iwita mena. Ana nangamang ningi nunguning, se yawarakala baganakko.

39